తెలుగు

తెలుగు తల్లి ప్రార్థనా గీతం

మా తెలుగు తల్లికి మల్లెపూదండ

మా కన్నతల్లికి మంగళారతులు

కడుపులో బంగారు కనుచూపులో కరుణ

చిరునవ్వులో సిరులు దొరలించు మా తల్లి

గలగలా గోదారి కదలిపోతుంటేను

బిరాబిరా క్రిష్ణమ్మ పరుగులిడుతుంటేను

             బంగారు పంటలే పండుతాయీ
             మురిపాల ముత్యాలు దొరులుతాయి

             అమరావతి నగర అపురూప శిల్పాలు
             త్యాగయ్య గొంతులో తారాడు నాదాలు

             తిక్కయ్య కలములొ తియ్యందనాలు
             నిత్యమై నిఖిలమై నిలచి వుండేదాకా

            రుద్రమ్మ భుజశక్తి మల్లమ్మ పతిభక్తి
            తిమ్మరసు ధీయుక్తి కృష్ణరాయల కీర్తి

             మా చెవులు రింగుమని మారుమ్రోగేదాక
             నీ ఆటలే ఆడుతాం! నీపాటలే పాడుతాం!!

             జై తెలుగు తల్లి!. జై తెలుగు తల్లి!! ......

ముందు మాట

“దేశ భాషలందు తెలుగు లెస్స”

శ్రీకృష్ణ దేవరాయులు చెప్పిన ఈ మాట చాలు మన తెలుగు భాషా ఔన్నత్యాన్ని చాటడానికి. నేటి సాంకేతిక వేగానికి ప్రపంచమే మన అరచేతిలోకి వస్తున్న నేపథ్యంలో తెలుగు భాష, సంస్కృతి, సంప్రదాయాలు మాత్రం మన నుంచి దూరం అవుతుండటం నిర్వివాద అంశం. అందుకే మన తెలుగు సంబంధిత భాషా, సంప్రదాయం తదితర విషయాలను సేకరించి వర్తమానంలోని సోదరులతో వాటిని సహృదయంతో పంచుకొని భవిషత్తు తరాలకు నిదిగా అందించాలని సంకల్పించాను. మీకు తెలిసిన అమూల్యమైన వివరాలను కూడా అందిస్తే వాటిని మీ పేరుతోనే ప్రచురిస్తాను.